ഖത്തർ : 46,601 ചതുരശ്ര മീറ്റർ വിസ്‌തീർണമുള്ള അൽ വക്ര പാർക്ക് തുറന്നു പ്രവർത്തിക്കാൻ ഒരുക്കം.95% ജോലികളും പൊതുമരാമത്ത് അതോറിറ്റി പൂർത്തിയാക്കിയതായി ഖത്തറിലെ പ്രാദേശിക ദിനപ്പത്രം റിപ്പോർട്ട് ചെയ്തു.
അറ്റകുറ്റപ്പണികൾ നടത്തിയ നടപ്പാതകൾ, മുതിർന്നവർക്കുള്ള ഫിറ്റ്നസ് ഉപകരണങ്ങൾ, കുട്ടികൾക്കുള്ള പുതിയ കളിസ്ഥലങ്ങൾ എന്നിവയോടെ പാർക്ക് നവീകരിക്കുകയും പ്രാർത്ഥനാമുറികൾ, ബാർബിക്യൂ ഏരിയ, വിശ്രമമുറികൾ, ഇവൻ്റുകൾക്കുള്ള പ്രധാന സ്ക്വയർ, കൃത്രിമ തടാകം എന്നിവയും ഇതിൽ ഉൾപ്പെടുന്നു.
പാർക്കിൻ്റെ 70% പച്ചപ്പിൽ പൊതിഞ്ഞതിനാൽ, കാലാവസ്ഥ മെച്ചപ്പെടുത്താനും താപനില കുറയ്ക്കാനും കാർബൺ ഉദ്‌വമനം കുറയ്ക്കാനും ഇത് സഹായകമാകും. 1980-കളുടെ അവസാനം മുതലുള്ള പല ചെടികളും മരങ്ങളും സംരക്ഷിച്ചുകൊണ്ട് പഴയ പാർക്കിൻ്റെ അതെ സ്ഥലത്താണ് പുതിയ പാർക്ക് പണിതത്.
പാർക്കിൽ വാക്കിങ്, സൈക്ലിംഗ് പാതകളും ഉണ്ട്. പ്രത്യേക ആവശ്യങ്ങളുള്ള ആളുകൾക്കുള്ള സ്ഥലങ്ങൾ ഉൾപ്പെടെ ധാരാളം പാർക്കിംഗ് സ്‌പേസുകൾ നൽകിയിട്ടുണ്ട്. കൂടാതെ, സുരക്ഷയ്ക്കായി നിരവധി സൗരോർജ്ജ ലൈറ്റുകളും നിരീക്ഷണ ക്യാമറകളും സ്ഥാപിച്ചിട്ടുണ്ട്.
നവീകരണത്തിൽ ജലസേചനം, വൈദ്യുതി, മലിനജലം, മഴവെള്ളം ഒഴുകിപ്പോകാനുള്ള സംവിധാനങ്ങൾ എന്നിവ ഉൾപ്പെടെ പാർക്കിൻ്റെ അടിസ്ഥാന സൗകര്യങ്ങളുടെ പൂർണ്ണമായ നിർമാണം ഉൾപ്പെടുന്നു.
